Ahu surat ni sintua i mandapothon si Gayus, haholongan i, na hu haholongi situtu.
2
Ale anggia, sandok dipangido rohangku, naeng horas ho jala hipas, hombar tu horas ni tondim!
3
Tarhilas situtu do rohangku, di na ro angka dongan i manghatindangkon hasintongan na di ho rodi parangem, na di bagasan hasintongan.
4
On do las ni rohangku na umbolon: Molo hu bege, diparangehon angka anakkonku hasintongan i.
5
Na denggan do pambahenmi, anggia, na tu angka dongan, nag tu angka tamue.
6
Dihatindangkon nasida do holong ni roham, di jolo ni huria i.Denggan ma paborhatonmu nasida, marguru tu na tama di Debata.
7
Ai ala ni goar i do nasida borhat; ndang adong dijalo nasida agia aha sian parbegu.
8
Dibahen i, tama ma hita manjangkon angka na songon i, asa gabe dongan pangula hita, pajongjong hasintonggan i.
9
Hubahen do surat tu huria i; alai ndang dijangkon si Diotrepes hami, ai naeng ibana do na guminjang.
10
Dibahen i, anggo dung ro ahu, taringotanku ma pambahenna i, na niulana manihas-nihasi hami marhite-hite angka hata na roa. Jala ndang sombu dope rohana disi; ai laos do dijangkon do angka dongan i, diambat do angka na ringkot roha jala dipabali do sian huria.
11
Unang ihuthon na roa, anggia; na denggan i ma! Sian Debata do halak na mangulahon na denggan; ai si ula na roa ndang dung diida i Debata.
12
Dapotan panindangion do si Demetrius sian saluhutna, nang sian hasintongan sandiri; songon i do nang sian hami, jala diboto ho do, na sintong do panindangion na sian hami.
13
Godang do nian si surathononku tu ho; alai ndang une rohangku, manurat tu ho marhite-hite tinta dohot panurat.
14
Alai dihirim rohangku, naeng tibu ho idaonku, dung i mangkatai ma hita adop bohi be. (1-15) Dame ma di ho! Na manongos tabi do tu ho angka dongan. Pasahat ma tabingku tu angka dongan sadasada!